Wenn dumm bisch, bisch tumm, bisch tumm, bisch tumm
Drum weisch chuum, wie’n’ich vom Bischtum
zum Vatikan chumm

De Papst chaflet am Bleistift, im Ranze es Loch
schribt uf es Papier: Bitte rüefet im Choch!!!
Doch s’ Papier, Jesses-Gott, isch d’Lischte, wo s’ füehre
für d’Kardinals-Rüef, si wänd’s sofort radiere,
händ im Vatikan gsuecht über Stunde und Stunde
Doch si händ leider kein einzige Gummi gfunde

(Übrigens
Die hüttigi Opferstock-Kollekte goht and’ Anti-Aids-Stiftig:
Jede Kappe zählt!)

Letschti hockt i de Mäss de Signor Berlusconi
Und zahlt ohni z’ Motze in Opferstock Boni
D’ Perdigt sig guet gsi, ganz i sim Sinn
I de Hoschtie heigis nur s’Beschte drin
Nur de Mäss-Wii gfalli ihm nid, de seigi halt
Mit Johrgang 91 scho ächli z’alt

Und die Machthaber, das findi no schlimmer
Händ ned gnueg amne eifache Hotelzimmer
Für de Ghaddafi, de Lackaff, muesch e Zält härepacke
Dr’ Hosni will e Mu-Barakke
Dr’ Berlusconi Silvio
Will ä Bunga-Bungalow
(Und dr’ Badener Stadtrot muess nochli warte
De wött e ganze Botta…-nische Garte)

De’sch riif für die letscht Ölig, de Berlusconi
Drum gitts in Italie Demon-strazioni
Au a andere Ort hett mer demonstriert
Und gäge die alte Säck proteschtiert
Eine hetts Gott sei Dank kapiert
De Gottschalk hett demissioniert

(Übrigens:
Di hüttige Opferstock-Kollekte goht and’ Stiftig für magersüchtigi Nachwuchs-Models:
Jeder Happen zählt!)


Känned ihr das Gschichtli scho
Vo dem arme Hayek, wo
Letscht Johr isch i Himmel cho
Doch händ’s ihn dört ned inegloh

Richi chönne sowieso
Ned is Himmelrich igoh
S’ Himmelstor isch halt eso
Äng wie s’Nadelöhr, döt wo
De Fade sötti duregoh
Aber keis Kamel mit zwo
Höcker je würd durecho

De Hayek de isch gar ned froh
Wie fädlet är jetzt trotzdem no
i, dass er durs Öhr cha goh
Dass er dört würd durecho?
Är möchti d’ Schwizer Ski-Natio-
nal-Mannschaft um Hilf agoh
Bim Ifädle händ si jo
Alli andre chönne schlo!

(Übrigens:
Di hüttigi Opferstock-Kollekte goht ad Drogenhilf-Stiftig:
Jeder Rappaz zählt!)

Do hocket im Biichtstuehl sonen alte Pirat
Er seigi für Untate wider parat
Im Färnseh sige d’Pirate de Ränner
D’ Karibik-Fluech-Film sige Dauerbränner
Im 10 vor 10 tüeg d’Frau Wille verzelle
Wi d’Somalier-Pirate ihri Falle tüend stelle
Er meint, er wär au sone Beute-Jeger
Sig bruunbrännt und chruslig wi d’Somalia-Neg..
Er brücht keis grosses Meer, das sig gar e kei Sach
Ihm längt scho de chlini Leutsche-Bach
….
Do hani gseit, du Schlawinski,
Gang mit Gott, He Jo!
Bisch zwar ned de Johnny,
doch e Depp bisch halt scho!

(Und übrigens hett dr’ Roger reklamiert
Dr’ Gutteberg heig siiini Ideä kopiert
Frogt sich, welä vo beedne me plagiert?)

(Übrigens
Die hüttigi  Opferstock-Kollekte goht and Stiftig vo dr Billag:
Jder Lappen zählt!)

Oh, du goldigs Sünneli
Tue doch wider schiine
Bitte, bliib de ganz Tag do
Dass mir chönd is Wälsche goh
Und döt verusse umestoh
Si löhnd eus nienet ine

Oh, du armi SVP,
mer wänd dich zu eus hole
Mer würde dir 1000 Quadratmeter geh
Im Gstüehl-Center, gäbtis anschiinend no meh
Oh, SVP,  du hesch jo eh
En Art Gstüehl-Gang-Parole!

(Und susch chönder mit GC fusioniere
Und z’Aarau s’Brügglifeld okkupiere!
Und händ dr am Änd mehr als füffzig Prozänt
Dä schaffe mer euch us is Dschungelcämp)

Übrigens:
Wenn ich zur Dentalhygiene goh
Muess i zwe Läppe ligge loh
Bi de SVP lauft das alles wie gschmiert
Dene wird gratis d’Frässi poliert!
(Das isch doch eifach nöd fehr!)

(Übrigens
Di hüttigi Opferstock-Kollekte goht ad Stifti für kriminelli Jugendlichi:
Jeder Rapper zählt.)

Ich bi de Blatter Seppeli,
im ganze Land bekannt.
Be friener s’flottischt Bürschtli gsi,
jetzt bin i im Verband.
Ich mache gärn die hohli Hand,
mer seit, s’seig allerhand.
S’isch alles nur em Fuessball z’lieb,
e FIFA s’ Vaterland!

(Melodie: Sidi Abdel Asser)
Ich bi dr’ Fuessball-Adlig Jussuf Blattar
Ich fühl mi quasi als de Fuessball-Vatar
Verchauf mis Härz bi Allah
Und alli die Fuess-Balla
Und hoff, si händ am Schluss kei Muskel-Qatar!

(Übrigens:
Di hüttigi Opferstock-Kollekte goht and’ Kachelmaa-Stiftung für Nachwuchs-Wätterfrösch:
Jedi Kaulquappe zählt)

Regionales:

Komm Herr Jesus, sei unser Gascht
Und segne, was du uns bescheret hascht

Das Bitzli choche isch doch ned so schwer,
Seit mi Schatz
Ich söll in Kurs go, demit ich das jetzt lehrr,
Seit mi Schatz
Er heig mi igschribe bir Anne-Marie W.
S’isch die vom Färnseh,
Seit mi Schatz

Es bitzli Rüebli, es bitzli Bluemchöl
Seit min Schatz
E Zingge Chnobli und ab is heisse’n’ Öl
Seit min Schatz
Und denn no würze mit em Chrütli vom Rappaz
Und fertig dünschtet
Isch die Chatz

(Trudi Gerster )
Ich verzelle’n’ eu s’Merli vom gstiflete Kater,
wo vom Mutschelle her uf Wohle
hett welle sis Büsi go hole:

Azelle, Bölle schelle
D’ Chatz goht übere Mutschelle
Hett si strammi Bai
Chunnt si nümme hai

Piff!  Paff! Puff !

…

(Übrigens:
Die hüttigi Opferstock-Kollekte goht and Kinder-Hilf für d’Nano-Mania-Opfer
Jedes Knabbern quält!)

D’ Sunne schiint, es glänzt de Schnee
Nur tuet mer s’ Gipfel-Chrütz so weh
Au s’Limmat-Chnü knirscht i de Glänk
und mit em Stüür-Fuess hesch es Gschänk
Und uf em Chopf isch s’ Hoor bald weg
Es kahls Ei: änglisch es Bald Egg (Baldegg = Badener Hausberg)

Drum gohts jetz uf die heilig Alp
Mit Sänne-Tunschi, Geiss und Chalb
Denn uf dr’ Alp, do gitt’s kei Sünde
Wie Mönch und Jungfrau keusch verkünde
Und möcht de Schwizer trotzdem loche
Denn wird halt s’Gotthardloch durch-stoche!

(Übrigens:
Di hüttige Opferstock-Kollekte goht and Stiftig „Einer wie Beni“:
Jedes Plappern zählt)

Mer kännt d’Usbrächer-Type in Bade jo
Die händ sich  und d’Polype am Seil abe gloh
Doch die drei händ Stiil, und es Ziil und vill Gfühl
z’Rägesdorf bittes’ um Gfängnis-Asyl
Denn dört betriibi e Wärterin glaub
Im Bäse-Schrank inne Soome-Raub

Doch no besser sind d’Bieler Polizischte
Die sind ebe würklich gueti Chrischte
Wäg de Chnöibüehl–Gschicht ärntes Hohn und Spott
Debi glaubes doch nume an drü-faltigi Gott
Mit em Foto des Vaters des Sohnes i de Händ
Sind si em Heilige Geischt noche-grännt

Vo Chileplatz bis Lägere
tüend mer d’Gasse fägere  ….
Vom Martinsberg bis Hertenstein
Waschen wir euch von Sünden rein

In Gottes Namen
AMEN

© 2011 Patti@Gassefäger